பிரின்ஸ் பிக்சர்ஸ் சார்பில் தயாரிப்பாளர் லக்ஷ்மன் குமார் தயாரிப்பில் சில வாரங்களுக்கு முன்னர் வெளியான ‘லப்பர் பந்து’ திரைப்படம் சூப்பர் ஹிட்டாகியுள்ளது. அறிமுக இயக்குநர் தமிழரசன் பச்சமுத்து இயக்கியுள்ள இந்த படத்தில் ஹரிஷ் கல்யாண், அட்டகத்தி தினேஷ், சுவாசிகா விஜய், சஞ்சனா கிருஷ்ணமூர்த்தி ஆகியோர் முதன்மை கதாபாத்திரங்களில் நடிக்க முக்கிய வேடங்களில் பால சரவணன், காளி வெங்கட் உள்ளிட்ட பலர் நடித்திருந்தனர். ஷான் ரோல்டன் இந்த படத்திற்கு இசையமைத்து இருந்தார். இந்த படம் இதுவரை 30 கோடி ரூபாய் அளவுக்கு வசூலித்துள்ளது.
இந்த படம் வெளியான பின்னர் கார்த்தியின் மெய்யழகன் மற்றும் தேவரா போன்ற பெரிய படங்கள் ரிலீஸானாலும் இன்னமும் இந்த படத்துக்குக் கூட்டம் குறையவில்லை. அந்த அளவுக்கு ரசிகர்களை இந்த படம் கவர்ந்துள்ளது.
இந்நிலையில் இந்த படத்தின் சிறப்புக் காட்சியை விடுதலை சிறுத்தைகள் கட்சி தலைவர் திருமா வளவன் பார்த்துப் பாராட்டியுள்ளார். படம் சம்மந்தமாக அவர் பேசும்போது “கிரிக்கெட் வீரர்களை தேசிய அணிக்காக தேர்வு செய்வதில் சாதி உள்ளது. வட இந்தியா, தென்னிந்தியா மற்றும் இந்தி பேசும் மாநிலங்கள் என அடையாள அரசியல் உள்ளது. கிராமப்புறங்களில் கிரிக்கெட் விளையாட்டில் சாதி முக்கியப் பங்கு வகிக்கின்றது என்பதை லப்பர் பந்து படம் காட்டியுள்ளது.” எனப் பாராட்டியுள்ளார்.
