விருமன் திரைப்படத்தின் முதல் சிங்கிள் பாடல் வெளியாகி ஏற்கனவே இணையத்தில் வைரல் ஆகியுள்ளது குறிப்பிடத்தக்கது.
இயக்குனர் முத்தையா இயக்கத்தில் கார்த்தி நடித்துள்ள விருமன் திரைப்படத்தின் படப்பிடிப்பு முடிவடைந்து தற்போது தொழில்நுட்ப பணிகள் விறுவிறுப்பாக நடைபெற்று வருகிறது. இந்த படத்தில் கார்த்தியோடு அதிதி ஷங்கர், ராஜ்கிரண் மற்றும் பிரகாஷ் ராஜ் உள்ளிட்ட ஏராளமானவர்கள் நடித்துள்ளனர். இந்த படம் ஆகஸ்ட் 31 ஆம் தேதி வெளியாகும் என்று அறிவிக்கப்பட்டுள்ளது. விநாயகர் சதுர்த்தியை முன்னிட்டு அப்போது நீண்ட விடுமுறை வருவதால் அந்த தேதியைப் படக்குழு முடிவு செய்துள்ளது.
படத்துக்கு யுவன் ஷங்கர் ராஜா இசையமைத்துள்ளார். ஏற்கனவே படத்தில் இடம்பெற்ற ‘கஞ்சா பூவு கண்ணால’ பாடல் வெளியாகி இணையத்தில் ஹிட் ஆனது. இந்நிலையில் படத்தின் இசை வெளியீட்டு விழா மதுரையில் நடக்க உள்ளதாக தகவல்கள் வெளியாகியுள்ளன. மதுரையில் உள்ள ராஜா முத்தையா மன்றத்தில் ஆகஸ்ட் முதல் வாரத்தில் நடக்கும் என சொல்லப்படுகிறது.
வழக்கமாக படங்களின் ஆடியோ ரிலீஸ் விழா சென்னையில் நடக்கும். ஆனால் படத்தின் கதைக்களம் மதுரை என்பதால் படக்குழுவினர் மதுரையில் நடத்த திட்டமிட்டுள்ளதாக சொல்லப்படுகிறது.
