சென்னையில் இன்று உலகக்கோப்பை போட்டியில் இந்தியா - ஆஸ்திரேலியா அணிகள் மோத உள்ள நிலையில் மழை பெய்யுமோ என்ற அச்சம் எழுந்துள்ளது.
ஐசிசி ஒருநாள் உலக கோப்பை போட்டிகள் இந்தியாவில் தொடங்கி பரபரப்பாக நடந்து வருகிறது. இந்தியாவின் 9 மைதானங்களில் நடைபெறும் இந்தப் போட்டிகளின் நான்காவது போட்டியான இந்தியா - ஆஸ்திரேலியா இடையேயான போட்டி இன்று சென்னை சேப்பாக்கம் மைதானத்தில் நடைபெற உள்ளது. இந்த போட்டிகளை காண ரசிகர்கள் மிகவும் ஆர்வமாக உள்ளனர்.
ஆனால் கடந்த சில நாட்களாகவே சென்னையில் அவ்வப்போது மழை பெய்து வருகிறது. இந்நிலையில் போட்டி நடைபெறும் இன்றும் சென்னையில் இடியுடன் கூடிய லேசான மழை பெய்ய வாய்ப்புள்ளதாக சென்னை வானிலைஆய்வு மையம் தெரிவித்துள்ளது.
முன்னதாக இலங்கையில் நடந்த ஆசியக் கோப்பை கிரிக்கெட் போட்டியின் போதும் மழையின் குறுக்கீட்டால் சுவாரசியமான பல மேட்சுகள் சொதப்பலாகி போனது. இந்நிலையில் இன்று நடைபெறும் இந்தியா ஆஸ்திரேலியா இடையேயான போட்டியில் மழை குறுக்கீடு இல்லாமல் இருக்க வேண்டும் என்பதே ரசிகர்கள் பலரின் எதிர்பார்ப்பாக உள்ளது.
