கடலூர் மாவட்டத்தில், முன்னணி உணவு டெலிவரி நிறுவனங்களான சொமாட்டோ (Zomato) மற்றும் ஸ்விக்கி (Swiggy) சேவைகளுக்கு பதிலாக, கடலூர் மாவட்ட ஹோட்டல் சங்கம் ஒரு புதிய செயலியை அறிமுகப்படுத்தியுள்ளது. இதற்கு முக்கிய காரணம், டெலிவரி நிறுவனங்கள் தங்கள் கமிஷன் தொகையை அதிகரித்ததுதான் எனத் தெரிவிக்கப்பட்டுள்ளது.
புதியதாகத் தொடங்கப்பட்டுள்ள Zaaroz என்ற செயலி மூலம், கடலூர் மாவட்ட மக்கள் ஹோட்டல்களில் இருந்து குறைந்த விலையில் உணவை பெற முடியும். இந்த செயலி, நேரடியாக ஹோட்டல்கள் சங்கத்தால் இயக்கப்படுவதால், இடைத்தரகர்கள் இல்லாமல் வாடிக்கையாளர்களுக்கும் ஹோட்டல்களுக்கும் இடையே நேரடி தொடர்பு ஏற்படும். இதன் மூலம், கமிஷன் கட்டணங்கள் குறைக்கப்பட்டு, வாடிக்கையாளர்களுக்கு செலவு குறையும் என்று எதிர்பார்க்கப்படுகிறது.
கடலூரில் எடுக்கப்பட்ட இந்த முடிவு, தமிழகத்தின் பிற மாவட்டங்களிலும் இதேபோன்ற முயற்சிகளை தூண்டக்கூடும் என கூறப்படுகிறது. அனைத்து மாவட்டங்களிலும் உள்ள ஹோட்டல் சங்கங்கள் இணைந்து தங்கள் சொந்த டெலிவரி செயலிகளை தொடங்கினால், சொமாட்டோ மற்றும் ஸ்விக்கி போன்ற நிறுவனங்கள் தமிழகத்தை விட்டு வெளியேறும் சூழல் உருவாகலாம் என்றும் கூறப்படுகிறது.
இந்த நடவடிக்கை, உணவு டெலிவரி சந்தையில் ஒரு பெரிய மாற்றத்தை ஏற்படுத்தும் என்று எதிர்பார்க்கப்படுகிறது.
