தமிழ் சினிமாவின் கமர்ஷியல் வெற்றி பெற்ற படங்களில் ‘சூர்யவம்சம்’ திரைப்படத்துக்கு முக்கிய இடம் உண்டு. சரத்குமாரை ஒரு மிகப்பெரிய ஸ்டார் நடிகர் ஆக்கியதில் இந்த படத்துக்கு பெரும்பங்கு உண்டு. 1997 ஆம் ஆண்டு ரிலீஸான இந்த திரைப்படம் பட்டி தொட்டி எங்கும் சூப்பர் ஹிட் ஆனது. திரையரங்கில் அதிக ரசிகர்களால் பார்க்கப்பட்ட படம் என்ற சாதனையைப் படைத்தது. இன்றளவும் தொலைக்காட்சி, யுட்யூப் என ரசிகர்களால் தொடர்ந்து பார்க்கப்பட்டு வருகிறது.
சமீபத்தில் இந்த படத்தின் 25 ஆம் ஆண்டு விழாவை படக்குழுவினர் கொண்டாடினர். இந்நிலையில் இப்போது இந்த படத்தின் இரண்டாம் பாகம் பற்றி நடிகர் சரத்குமார் பேசி இருப்பது எதிர்பார்ப்பை ஏற்படுத்தியது. ஒரு பத்திரிக்கையாளர் சந்திப்பில் பேசும்போது அவர் “சூர்யவம்சம் 2 படத்துக்கான பேச்சுவார்த்தைகள் தொடங்கியுள்ளன. கதை உறுதியானால் படத்தை தொடங்குவதற்கான வாய்ப்புகள் உள்ளன” எனக் கூறியுள்ளார்.
இந்நிலையில் சூர்யவம்சம் படத்தின் இணை இயக்குனராகப் பணியாற்றியவரும், நடிகை தேவயானியின் கணவருமான ராஜகுமாரன் ‘சூர்யவம்சம் 2’ எடுப்பது பற்றி ஒரு ஐடியாவைக் கூறியுள்ளார். அதில் “சூர்யவம்சம் படத்தில் சரத்குமார், தேவயானி தம்பதிகளுக்கு சக்திவேல் என்ற குழந்தை இருக்கும். அந்த சக்திவேலாக இப்போது சிவகார்த்திகேயன் நடிப்பில் சூர்யவம்சம் 2 எடுத்தால் நன்றாக இருக்கும்” எனக் கூறியுள்ளார்.
