கமல்ஹாசன் நடிப்பில் ஷங்கர் இயக்கத்தில் உருவாகி வரும் ’இந்தியன் 2’ படம் தொடங்கப்பட்டு நான்கு ஆண்டுகளுக்கு மேலாகியும் இன்னும் ரிலீஸாகவில்லை. படப்பிடிப்புத் தளத்தில் நடந்த விபத்தில் மூன்று பேர் உயிரிழந்ததை அடுத்து படப்பிடிப்பு நிறுத்தப்பட்டது. அந்த பிரச்சனைகளை எல்லாம் கடந்து, தற்போது மீண்டும் தொடங்கி ஷூட்டிங் விறுவிறுப்பாக நடந்து வருகிறது.
சமீபத்தில், இந்த படத்தின் ஷூட்டிங் தென் ஆப்பிரிக்கா மற்றும் தைவான் ஆகிய நாடுகளில் நடந்தது. படத்தில் கமல்ஹாசனோடு சித்தார்த், காஜல் அகர்வால், ரகுல் ப்ரீத் சிங், ப்ரியா பவானி சங்கர், குரு சோமசுந்தரம் உள்ளிட்ட ஏராளமான நட்சத்திரங்கள் நடிக்கின்றனர்.
ஆனால் படத்தில் முக்கிய வில்லன் வேடத்தில் நடிப்பது யார் என்பதை படக்குழு இதுவரை அறிவிக்காமல் இருந்தது. இந்நிலையில் அந்த வேடத்தில் எஸ் ஜே சூர்யாதான் நடிக்க உள்ளதாக தகவல்கள் பரவி வருகின்றன. ஷங்கர் இயக்கும் மற்றொரு படமான கேம்சேஞ்சர் படத்திலும் எஸ் ஜே சூர்யாதான் வில்லன் என்பது குறிப்பிடத்தக்கது.
