’கேங்கர்ஸ்’ படத்தின் மூலம் வடிவேலு சுந்தர் சி காம்பினேஷன் 15 ஆண்டுகளுக்குப் பிறகு இணைந்துள்ளது. இதனால் இந்த படத்தின் மீது சினிமா ரசிகர்களுக்கு எதிர்பார்ப்பு எழுந்தது. இதில் வடிவேலு பழைய நகைச்சுவை மன்னனாக கம்பேக் கொடுப்பார் என டிரைலர் பார்த்தவர்கள் கருத்து தெரிவித்து வருகின்றனர்.
இந்நிலையில் கடந்த வாரம் படம் ரிலீஸான நிலையில் வழக்கம் போல பெரிய அளவில் நேர்மறையான விமர்சனம் கிடைக்கவில்லை. ஆனால் சுந்தர் சி படங்களுக்கு என்றுதான் நல்ல விமர்சனம் வந்துள்ளது?. ரசிகர்கள் மத கஜ ராஜா படத்தை எல்லாம் பார்த்துக் கொண்டாடவில்லையா?. அந்த வகையில் இந்த படத்துக்கு முதல் நாள் வசூல் கணிசமாக இருந்துள்ளது. முதல் நாளில் இந்த படம் தமிழக அளவில் சுமார் 60 லட்ச ரூபாய் வசூலித்துள்ளதாக சொல்லப்பட்டது.
அதற்கடுத்த நாட்களிலும் படத்துக்கு பெரிய அளவில் வசூல் இல்லை. ஆனால் வார இறுதி நாட்களில் நல்ல வசூல் கிடைத்ததாக சொல்லப்பட்டது. இந்த வாரம் ரெட்ரோ மற்றும் டூரிஸ்ட் பேமிலி ஆகிய படங்கள் ரிலீஸாகியுள்ள நிலையில் கணிசமான திரைகளில் இருந்து அந்த படம் தூக்கப்பட்டுள்ளது. இந்நிலையில் ஒரு வாரத்தில் இந்த படம் 8 கோடி ரூபாய் அளவுக்கு வசூலித்துள்ளதாகத் தகவல் வெளியாகியுள்ளது. ஆனால் படத்தின் ஓடிடி வியாபாரம் மிகப்பெரிய தொகைக்கு விற்கப்பட்டுள்ளது.
