மகளிர் ஆசிய கோப்பை டி20 கிரிக்கெட் போட்டி: இந்தியா வெற்றி

ஆசிய கோப்பை டி20 கிரிக்கெட் தொடரின் இன்றைய போட்டியில் இந்திய அணி 7 வீக்கெட் வித்தியாசத்தில் இலங்கை அணியை வீழ்த்தியது.

இந்தியா, பாகிஸ்தான், இலங்கை, வங்காளதேசம், மலேசியா, சிங்கப்பூர் ஆகிய 6 அணிகளும் மோதும் ஆசிய கோப்பை டி20 கிரிக்கெட் தொடரில் நடந்த இன்றைய போட்டியில் இந்தியா- இலங்கை அணிகள் மோதின.

இந்த போட்டியில் டாஸ் வென்ற இலங்கை அணி பேட்டிங் தேர்வு செய்து 20 ஓவர்களில் 7 வீக்கெட் இழப்பிற்கு 107 ரன்கள் எடுத்தது. அதிகப்பட்சமாக ஹஸினி பெரேரா 46 ரன்கள் எடுத்து ஆட்டமிழக்காமல் இருந்தார். இந்திய அணி தரப்பில் ஏக்தா பிஷ்ட் 2 வீக்கெட்டுகளை கைப்பற்றினார்.

108 ரன்கள் எடுத்தால் வெற்றி என்ற எளிய இலக்குடன் களமிறங்கிய இந்திய அணி 18.5 ஓவர்களில் 3 வீக்கெட்டுகளை இழந்த நிலையில் வெற்றி இலக்கை எட்டியது. அதிகப்பட்சமாக வேதா கிருஷ்ணமூர்த்தி 29 ரன்கள் எடுத்து ஆட்டமிழக்காமல் இருந்தார்.