நடிகர் சங்கத் தேர்தல் ரத்து; மேல்முறையீடு செய்ய விஷால் தரப்பு முடிவு

கடந்த ஆண்டு நடைபெற்ற நடிகர் சங்கத் தேர்தலை ரத்து செய்து சென்னை உயர்நீதிமன்றம் உத்தரவிட்ட நிலையில் மேல்முறையீடு செய்ய விஷால் தரப்பு முடிவு செய்துள்ளது.

கடந்த ஆண்டு ஜூன் மாதம் நடைபெற்ற நடிகர் சங்கத் தேர்தலில் விஷாலின் பாண்டவர் அணியும், ஐசரி கணேஷின் சவாமி சங்கரதாஸ் அணியும் மோதின. இதனை தொடர்ந்து தேர்தலில் முறைகேடு நடந்துள்ளதாக பதிவு செய்யப்பட்ட வழக்கின் காரணமாக வாக்கு எண்ணிக்கை நிறுத்தி வைக்கப்பட்டது.

இந்த வழக்கை விசாரித்த சென்னை உயர்நீதிமன்றம், ”கடந்த ஆண்டு நடைபெற்ற நடிகர் சங்கத் தேர்தல் செல்லாது, மறுதேர்தல் நடத்த வேண்டும்” என உத்தரவிட்டது. இந்நிலையில் தென் இந்திய நடிகர் சங்கத் தேர்தல் ரத்து செய்யப்பட்டதை எதிர்த்து திங்கட்கிழமை மேல் முறையீடு செய்யவுள்ளதாக விஷால் தரப்பு முடிவு செய்துள்ளது.