இரண்டில் ஒன்று தான்.. வேறு ஆப்ஷன் இல்லை.. கமலுக்கு கறார் நிபந்தனை விதித்த திமுக..!

திமுக கூட்டணியில் கமல்ஹாசன் கட்சிக்கு இரண்டு தொகுதிகள் வேண்டும் என்று கேட்கப்பட்ட நிலையில் கடைசியில் ஒரு தொகுதி கொடுங்கள் கோவை அல்லது தென்சென்னை கொடுங்கள் என்று கேட்கப்பட்டதாகவும் கோவை கம்யூனிஸ்ட் கட்சிக்கு ஒதுக்கப்பட்டு விட்டதாக கூறிய திமுக தென்சென்னை திமுகவின் கோட்டை என்பதால் அதை கொடுக்க வாய்ப்பே இல்லை என்று பதில் கூறியதாகவும் கூறப்படுகிறது.

இதனை அடுத்து  ஒரு தொகுதிக்கு ஒப்புக்கொண்ட திமுக அந்த ஒரு தொகுதியில் கமல்ஹாசன் போட்டியிட வேண்டும் என்றும் அதுவும் உதயசூரியன் சின்னத்தில் தான் போட்டியிட வேண்டும் என்றும் நிபந்தனை விதித்ததாக தெரிகிறது.

இதற்கு கமல்ஹாசன் ஒப்புக்கொள்ளவில்லை என்றும் ஒரு கட்சியின் தலைவரே இன்னொரு கட்சியின் சின்னத்தில் போட்டியிட்டால் நாங்கள் எதற்காக கட்சி நடத்த வேண்டும் என்று கூறியதாகவும் டார்ச் லைட் சின்னத்தில் தான் போட்டியிடுவோம் என்று உறுதியுடன் இருந்ததாகவும் கூறப்படுகிறது .

இதனை அடுத்து திமுக இறுதியாக ஒரு தொகுதி அதுவும் உதயசூரியன் சின்னம் அல்லது மாநிலங்களவை தொகுதி இரண்டில் ஏதாவது ஒன்றை நீங்களே முடிவு செய்து கொள்ளுங்கள் வேறு ஆப்ஷன் உங்களுக்கு இல்லை என்று கூறியதை அடுத்து வேறு வழியில்லாமல் தான் கமல்ஹாசன் மாநிலங்களவை தொகுதி என்பதை தேர்வு செய்ததாகவும் மக்கள் நீதி மய்யம் வட்டாரங்கள் கூறுகின்றன  

Edited by Siva