சின்னப் பசங்க எல்லாம் படத்தோட கலெக்‌ஷன் பத்தி பேசுறாங்க… சூர்யா வருத்தம்!

சூர்யா நடிப்பில் கிட்டத்தட்ட இரண்டு ஆண்டுகளுக்குப் பிறகு வெளியாக உள்ளது கங்குவா திரைப்படம். இந்த  படத்தை சிறுத்தை சிவா மிக பிரம்மாண்டமாக இயக்கி வருகிரார்.  இந்த கதை நிகழ்காலம் மற்றும் சில நூற்றாண்டுகளுக்கு முந்தைய காலம் என இரு காலகட்டங்களில் நடக்கும் விதமாக உருவாக்கப்பட்டுள்ளது. படத்தில் பாபி தியோல், திஷா பதானி, கே எஸ் ரவிக்குமார் உள்ளிட்டவர்கள் நடிக்க, வெற்றி ஒளிப்பதிவு மேற்கொள்ள, தேவி ஸ்ரீ பிரசாத் இசையமைத்துள்ளார்.

இந்த படத்தின் ஷூட்டிங் நடந்து முடிந்துள்ள நிலையில் தற்போது போஸ்ட் புரொடக்‌ஷன் பணிகள் நடந்து வருகின்றன.படம் 10 மொழிகளில் ரிலீஸ் ஆகவுள்ளதாக சொல்லப்படுகிறது. படத்தின் ரிலீஸ் நவம்பர் 14 ஆம் தேதி என அறிவிக்கப்பட்டுள்ளது. சூர்யா படம் ரிலீஸாகி இரண்டரை ஆண்டுகளுக்கு மேலாகியுள்ளதால் கங்குவா படம் மீது எதிர்பார்ப்பு அதிகமாக உள்ளது. இந்த படத்தை வட இந்தியாவில் மிகப்பெரிய அளவில் கொண்டு செல்ல வேண்டும் என நடிகர் சூர்யா பல முன்னணி இந்தி ஊடகங்களுக்கு நேர்காணல் அளித்து வருகிறார்.

அப்படி அவர் அளித்த ஒரு நேர்காணலில் “12, 13 வயது பசங்க எல்லாம் படத்தோட கலெக்‌ஷன்ஸ் பத்தி பேசுறாங்க. அவங்க உன் ஹீரோ படம் எவ்ளோ கலெக்‌ஷன், என் ஹீரோ படம் எவ்ளோ கலெக்‌ஷன் என சவால் விட்டுக் கொள்கிறார்கள். கலை என்பதைத் தாண்டி பாக்ஸ் ஆஃபிஸ் வசூல் இப்போது பேசுபொருளாகியுள்ளது. யாராவது கலை குறித்தும், கலைஞர்களின் பணி குறித்தும் அவர்களிடம் பேசத் தொடங்க வேண்டும்” எனக் கூறியுள்ளார்.